TRANSLOGISTICA KAZAKHSTAN 2026 ҚОРЫТЫНДЫСЫ ҚАЗАҚСТАННЫҢ ХАЛЫҚАРАЛЫҚ КӨЛІК-ЛОГИСТИКАЛЫҚ ЖҮЙЕДЕГІ РӨЛІНІҢ АРТА ТҮСКЕНІН РАСТАДЫ
2026 ЖЫЛҒЫ 14–16 ҚАЗАН АРАЛЫҒЫНДА АСТАНАДАҒЫ «EXPO» ХКО-ДА КӨЛІК-ЛОГИСТИКА САЛАСЫНЫҢ ЖЕТЕКШІ ӨКІЛДЕРІН, МЕМЛЕКЕТТІК ОРГАНДАРДЫ, ХАЛЫҚАРАЛЫҚ ҰЙЫМДАР МЕН ІСКЕРЛІК ҚОҒАМДАСТЫҚТЫ БІРІКТІРГЕН 29-ШЫ ҚАЗАҚСТАНДЫҚ ХАЛЫҚАРАЛЫҚ «КӨЛІК ЖӘНЕ ЛОГИСТИКА» КӨРМЕСІ — TRANSLOGISTICA KAZAKHSTAN 2026 ӨТТІ.
Үш күн ішінде іс-шараға 5 019 бірегей маман келіп, көлік инфрақұрылымын дамытуға, халықаралық бағыттарды кеңейтуге және заманауи логистикалық шешімдерді енгізуге деген тұрақты кәсіби қызығушылықты растады. Көрме Қазақстанның көлік апталығының маңызды құрамдас бөлігіне айналып, іскерлік байланыстарды нығайтуға және халықаралық деңгейде салалық ынтымақтастықты дамытуға ықпал етті.
2026 жылы көрме экспозициясы 20 елден 230 компанияны біріктірді. Қазақстанды 101 қатысушы, ал халықаралық сегментті 129 компания таныстырды. Экспоненттердің географиясы Әзербайжан, Беларусь, Германия, Грузия, Қазақстан, Қытай, Латвия, Литва, Люксембург, Нидерланд, Біріккен Араб Әмірліктері, Пәкістан, Ресей, Румыния, Түрікменстан, Түркия, Өзбекстан, Франция, Швейцария және Эстонияны қамтыды. Беларусь, Латвия, Литва, Түркия және Эстонияның ұлттық топтары өз елдерінің халықаралық тасымалдар мен логистикалық қызмет көрсету саласындағы мүмкіндіктерін таныстырды. Сонымен қатар, 40 компания көрмеге алғаш рет қатысып, экспоненттер құрамын кеңейтіп, салалық өзара іс-қимылдың жаңа бағыттарын ұсынды.
Көрме экспозициясы көлік-логистикалық кешенге арналған шешімдердің кең ауқымын қамтыды. Логистикалық процестерді автоматтандыруға, тасымалдарды цифрлық басқаруға, инфрақұрылымды жаңғыртуға және жүктерді өңдеу тиімділігін арттыруға ерекше назар аударылды. Салалық бағыттардың алуан түрлілігі келушілерге кешенді шешімдермен танысып, әлеуетті серіктестермен тікелей байланыс орнатуға мүмкіндік берді.
Көрме экспозициясымен қатар, TransLogistica Kazakhstan 2026 жұмысының маңызды бағыты мазмұнды іскерлік бағдарлама болды. Бағдарлама халықаралық көлік дәліздерін дамыту, қоймалық және жобалық логистика, инфрақұрылымды жетілдіру, саланы цифрландыру және Қазақстанның көлік кешегінің стратегиялық перспективалары сияқты тақырыптарды қамтыды.
14 қазанда, көрменің алғашқы күнінде «Жаңа дәуірдің көшбасшы әйелдері: адамдар, технологиялар және көлік пен логистиканың болашағы» пленарлық сессиясы, «Орталық Азия: жаңа логистикалық хаб» панельдік сессиясы, екі тақырыптық блоктан тұратын III BreakBulk Kazakhstan конференциясы, сондай-ақ «Аваза іс-қимыл бағдарламасын іске асыруды ілгерілету: өзара байланыстылық пен бәсекеге қабілеттілікті арттыру үшін кәсіби және орнықты автомобиль көлігі саласын қалыптастыру» атты өңірлік диалог өтті.
15 қазанда іскерлік бағдарлама Supply Chain Day тақырыптық күнімен жалғасты. Оның аясында екі тақырыптық блоктан тұратын Қазақстанның қоймалық логистикасы бойынша V конференциясы өтті.
Іс-шараның халықаралық мәртебесін Қазақстан Республикасында аккредиттелген дипломатиялық корпус өкілдерінің сапары да айқындады. Көрмеге Алжир, Беларусь, Болгария, Венгрия, Ирак, Италия, Иордания, Куба, Латвия, Литва, Моңғолия, Біріккен Араб Әмірліктері, Оман, Словакия, Түркия, Чехия, Швейцария, Эстония және Жапонияның дипломатиялық миссияларының өкілдері келді.
Екінші күннің бағдарламасында Қазақстанның көлік апталығы аясында өткен IX «New Silk Way» халықаралық көлік-логистикалық бизнес-форумы ерекше орын алды. Форум іс-шаралары аяқталғаннан кейін көрме экспозициясына көлік ведомстволарының басшылары, мемлекеттік құрылымдар мен халықаралық ұйымдардың өкілдерінен құралған халықаралық делегация келді. Құрметті қонақтардың қатарында Қазақстан Республикасының көлік вице-министрі Жәнібек Тайжанов, Ауғанстан теміржол басқармасының басшысы Абдул Карим Фатех, Беларусь Республикасының Көлік және коммуникациялар министрі Алексей Ляхнович, Иран Ислам Республикасының Жол және қала құрылысы министрі Фарзане Садег, Қырғыз Республикасының Көлік және коммуникациялар министрі Талантбек Солтобаев, Өзбекстан Республикасының Көлік министрі Илхом Махкамов, Әзербайжан Республикасының цифрлық даму және көлік министрінің орынбасары Джавид Гурбанов, Грузияның Экономика және тұрақты даму министрінің орынбасары Тамар Иоселиани, Түркия Республикасының Көлік және инфрақұрылым министрінің орынбасары Осман Бойраз, Ресей Федерациясы көлік министрінің орынбасары Борис Ташимов, Еуразиялық экономикалық комиссия Алқасының энергетика және инфрақұрылым жөніндегі мүшесі (министр) Арзыбек Кожошев, Иранның көлік ведомстволары басшылығының өкілдері Реза Акбари және Мохаммад Шакиби Насаб, Қытай Көлік министрлігінің қауіпсіздік жөніндегі бас инспекторы әрі Көлік қызметтері департаментінің бас директоры Цай Туаньцзе болды. Делегация мүшелері көлік-логистикалық қызметтер саласында жұмыс істейтін компаниялардың ұсыныстарымен танысты.
16 қазанда, көрменің қорытынды күнінде Expert Talks «FUTURE CHECK: Қазақстанның көлігі мен логистикасы 2035» сараптамалық пікірталасы өтіп, көлік-логистика саласының өзекті мәселелері мен ұзақ мерзімді даму перспективаларын талқылауға арналған үш күндік кәсіби бағдарламаны қорытындылады.
Коммуникацияның қосымша форматы ретінде саланың өкілдерін біріктірген «Әлемді алға жылжытатын адамдар» атты мамандандырылған подкаст-аймақ ұйымдастырылып, онда кәсіби тәжірибе алмасу және саланың даму перспективалары талқыланды.
Көрменің практикалық бағыты іс-шараға тікелей қатысқан компаниялардың өз әзірлемелерін таныстыру мүмкіндігіне берген бағасынан көрініс тапты: «Біздің Kusto Logistics Terminal компаниямыз бұл іс-шараға тұрақты түрде қатысады. Көрме аясында біз Иран, Өзбекстан және Қытайдан келген тапсырыс берушілермен және серіктестермен белсенді өзара іс-қимыл жасап, қолданыстағы іскерлік байланыстарды нығайтамыз және одан әрі ынтымақтастық перспективаларын талқылаймыз. Көрмені жоғары деңгейде ұйымдастырып, өткізгені үшін ұйымдастырушыларға шынайы алғысымызды білдіреміз», — деді Kusto Logistics Terminal компаниясының контейнерлік алаң бастығы Берік Калиев.
Іс-шараға деген сұраныстың тағы бір маңызды көрсеткіші — отандық және шетелдік компаниялардың ұсыныстарымен танысуға мүмкіндік алған кәсіби келушілер тарапынан көрсетілген қызығушылық болды: «Менің ойымша, мұндай көрмелер саланың және халықаралық ынтымақтастықтың дамуына айтарлықтай ықпал етеді, өйткені олар логистикалық компанияларға, экспедиторлар мен жеткізушілерге бір алаңда кездесуге мүмкіндік береді. Мұндай іс-шаралар көп емес және олар жаңа іскерлік байланыстар орнатуға үлкен мүмкіндіктер ашады», — деп өз пікірін ТОО «Глобал Логистик KZ» компаниясының негізгі клиенттермен жұмыс жөніндегі менеджері Филипп Макаренко білдірді.
Үш күннің қорытындысы бойынша TransLogistica Kazakhstan 2026 мемлекеттік органдардың, бизнестің және кәсіби қоғамдастықтың мүдделерін біріктіретін маңызды халықаралық салалық платформа мәртебесін тағы да растады. Қатысушылардың кең географиясы, шетелдік делегациялардың өкілді құрамы және мазмұнды іскерлік бағдарлама мемлекетаралық өзара іс-қимылды дамытуға, қолданыстағы серіктестіктерді нығайтуға және жаңа іскерлік байланыстар қалыптастыруға жағдай жасады.
Көрмеге Қазақстан Республикасы Көлік министрлігі, Астана қаласының әкімдігі, Қазақстан Республикасының «Атамекен» Ұлттық кәсіпкерлер палатасы, «Қазақстан темір жолы» ҰК» АҚ, KAZLOGISTICS Қазақстан көлікшілер одағы, Қазақстан тасымалдаушылары мен вагон операторларының қауымдастығы, Қазақстанның жүк теміржол тасымалдаушылары қауымдастығы және Ұлттық экспедиторлар қауымдастығы ресми қолдау көрсетті.
Көрменің серіктестері — WR LOGISTICS және Gradalogistic компаниялары.
Көрмені ұйымдастырушылар — қазақстандық Iteca және Атакент-Экспо көрме компаниялары және халықаралық серіктес — ICA Events компаниялар тобы.
